九廣鐵路九龍總站遷站

提起九廣鐵路，除咗會諗起幾日前提到嘅京九直通車，阿史仲會記起當年嘅總站，當然唔係講緊紅磡啦，而係講緊尖沙咀火車站。呢個原先喺1916年3月28日建成嘅車站，曾經係成條九廣鐵路嘅終點站，但就响1978年拆卸。

將尖沙咀定為九廣鐵路香港段嘅總站其實早喺1904年就已經決定，但係就喺1914年先開始動工，點知又遇上第一次世界大戰，令到工程受到影響，鐘樓就最先喺1915年完成，但成個車站就要喺1916年先可以完工。講返個車站，就咁睇相都覺得壯觀，紅磚同花崗岩砌成，側面設有唔少拱門，再加上羅馬式石柱同埋尖頂，果然可以稱得上係歐亞鐵路東方終點站。

當年經九龍總站出發，其實係可以通過列車接駁到法國巴黎嘅列車，真係唔講得笑。而由於唔少旅客都會喺呢一帶出入，吸引唔少商人喺度興建酒店，當中最出名就有半島酒店。但去到1975年，由於當時政府覺得呢塊土地可以有更好嘅發展，就決定將九龍總站遷去紅磡灣填海區，最後一班列車就喺1月29日14:55開出。